Повеќе од 120.000 американски домови во североисточниот дел на Соединетите Држави останаа без електрична енергија по пристигнувањето на тропската бура Хенри на Роуд Ајленд.
На милиони луѓе низ Лонг Ајленд и јужна Нова Англија им е кажано да се подготват за бранови, поплави, паднати дрвја и далноводи. Во меѓувреме, во поплавите во Тенеси загинаа најмалку 21 лице.
Десетици луѓе се уште се водат како исчезнати во и околу градот Веверли, околу 90 милји западно од Нешвил, по обилните врнежи.
Надојдената вода искорна огромни дрвја, носеше автомобили, патишта и мостови беа оштетени, а илјадници луѓе во округот Хамфрис останаа без електрична енергија.
Во училиштето е формиран центар за обединување на семејството и од луѓето се бара да донираат предмети за помош на раселените, соопшти канцеларијата на шерифот на округот Хамфрис.
Американскиот претседател Џо Бајден изрази сочувство до погодените и рече дека официјалните лица се подготвени да понудат помош таму каде што е потребно. Тој, исто така, одобри помош за државите Род Ајленд, Конектикат и Њујорк, кон каде се движи бурата Хенри.
„Ова невреме има потенцијал за широко распространети последици низ целиот регион со значителни поплави и прекин на електричната енергија што може да погодат стотици илјади луѓе“, рече Бајден.