Пред Кривичниот суд во Скопје денеска се одржа протест за поддршка на осудените лица за убиството на Никола Саздовски.
Саздовски почина од повреди, откако беше претепан во 2018 година. За убиството, Бесир Беља и Скендер Демири добија по 19 години затвор, пресуда која на обвинетите им ја изрече судијката Даниела Алексовска-Стојановска.
Во денешните протести учествуваа роднини на осудените лица и членови на навивачката група „Шверцери“, кои носеа транспаренти на кои пишуваше „Не сме извршиле свирепо убиство.“
Тие рекоа дека судските одлуки биле засновани на етничка припадност и дека осудените не сакале да му го одземат животот на Саздовски, а дека целта била физички напад кој завршил со случајна смрт.
„Се случи спонтано, без претходно планирање. Осудените не сакале да му го одземат животот. Тие не размислувале за убиство, уште помалку за свирепо убиство“, рекоа учесниците во протестот.
Тие побараа преиспитување на судската пресуда и преквалификација на делото од свирепо убиство, во насилство со смртни последици.
Од друга страна, семејството на убиениот Никола Саздовски и претставници на навивачката група „Комити“ до Јавното обвинителство вчера поднесоа жалба поради намалувањето на казните на извршителите на убиството од 19 на 16 години затвор.