Премиерот Зоран Заев денеска изјави дека за него е прифатливо во личните карти да стои етничка припадност, но ако Европската унија (ЕУ) има конкретна и прецизна директива по тоа прашање, ќе се постапи според таа ЕУ регулатива, бидејќи, како што рече, Македонија нема алтернатива освен полноправно членство во Унијата.
„Право на национално и сега, на сите земји членки на ЕУ така и наше е да го утврдиме делот на етничка застапеност. Амбасадорот најави дека од август ќе влезе во сила европска регулатива по овие прашања, а ние сакаме да бидеме членка на ЕУ. Нормално дека европските регулативи ќе ги почитуваме. Но, ниту знам детали од оваа европска регулатива на што се однесува, кои се конкретните детали или слично. Јас реков дека за мене е прифатливо да стои етничка припадност на граѓаните покрај државјанството, ние сме мултиетничка земја. Секако е прифатливо исто така и опционо дали некој сака или не сака да се додаде тоа, но ако ЕУ има конкретна и прецизна директива по тоа прашање ние знаете – немаме алтернатива освен полноправно членство во ЕУ“, одговори Заев на новинарско прашање по сведочењето за предметот „Титаник”, коментирајќи ја неодамнешната изјава на евроамбасадорот Дејвид Гир за внесувањето на етничката припадност во личните документи.
Евроамбасадорот Гир минатата недела изјави дека од август во ЕУ стапува на сила регулатива за заштита на лични податоци, со која се забранува споделување лични податоци, како расна, етничка, политичка и верска припадност.