Шефот на македонската дипломатија, Бујар Османи, денесќа ќе престојува во работна посета на Србија, при што ќе има средби со својот домаќин, министерот за надворешни работи Никола Селаковиќ, како и со српскиот претседател Александар Вучиќ, со претседателот на Народното собрание, Ивица Дачиќ и со премиерката Ана Брнабиќ, соопшти Министерството за надворешни работи (МНР).
На средбите ќе се разговара за билатералните односи, можностите за нивно интензивирање и продлабочување со нови форми и содржини од заемен интерес, посебно, како што соопшти МНР, во областа на економијата и трговската размена, во која веќе Србија претставува наш значаен партнер.
„Во услови на сложена пандемија и започнување на процес на вакцинација, ќе бидат разгледани напорите и активностите на двете влади во справувањето со последиците и ограничувањата во борбата со вирусот Ковид-19, како и меѓусебната соработка и координација на тој план“, се додава во соопштението.