Словенечкиот парламент денеска треба да донесе одлука за предлогот на опозицијата за недоверба на владата на Јанез Јанша. Опозициските лидери во средата поднесоа иницијатива за недоверба на владата и назначување на претседателот на Демократската партија на пензионери Карл Ерјавец за нов премиер. Опозицијата тврди дека сегашната влада лошо управува со епидемијата на коронавирус и ѝ штети на државата затоа што нејзината надворешна политика се оддалечува од либерално-демократското јадро на ЕУ и ги крши принципите на владеењето на правото и ги поткопува институциите за надзор. Јанша ги отфрли критиките и рече дека неговата влада сè уште има парламентарно мнозинство и дека тоа ќе биде потврдено. Тој ја обвини опозицијата за дестабилизација на земјата за време на пандемијата на ковид-19 пред почетокот на претседателството на Словенија со ЕУ, во втората половина на годината.
Словенечката опозиција бара гласање недоверба на Владата на Јанша
За гласање на недоверба на Владата е потребна поддршка од најмалку 46 од 90-те пратеници. Се проценува дека опозицијата нема шанси за успех ако не биде поддржана од некои дисиденти пратеници од владејачката коалиција, особено од пратениците на Партијата за модерен центар кои во некои наврати се изјаснија против некои потези и мерки на Јанша влада.