Од денеска основците во Грција се вратија во училишните клупи по пауза од речиси два месеци, но со посебни превентивни мерки, со задолжителна употреба на маска, како за учениците, така и за наставниците, јави МИА од Атина. Воведена е можноста за флексибилно време за почеток на наставата, различни големи одмори, отворање на повеќе од еден влез во училиштата за да се избегне создавање гужва како меѓу учениците, така и меѓу родителите и старателите. Училниците се опремени со антисептици, а предвидено и често проветрување на просториите.
Освен основните училишта, денеска се отворија и забавиштата и градинките. Министерката за образование на Грција, Ники Керамеос, утрово рече дека училиштата се природната средина за учениците, а ништо не може да ја замени наставата со физичко присуство.
Средношколците, од петокот продолжија со онлајн настава, планирано е во следниот период да се разгледа можноста и тие да се вратат во училишните клупи, а минатата седмица беше соопштено намалување на материјалот за државниот испит за матурантите.