На денешниот состанок на амбасадорите на Европската унија во Брисел, според наводите на европските дипломати, на дневен ред ќе бидат ставени заклучоците за проширувањето на ЕУ за Македонија и Албанија кои претходно не беа разгледувани поради бугарското вето на преговарачката рамка за нашата земја. Во Брисел ќе биде и вицепремиерот за европски прашања Никола Димитров, кој изјави дека германското претседателство е упорно и го користи секој момент за да издејствува да се усвојат заклучоците за проширувањето на ЕУ.
Каракачанов - Северна Македонија да го спроведе Договорот за добрососедство
Германскиот министер за европски прашања Михаел Рот во неговата последна колумна е категоричен дека „ЕУ мора да си го исполни ветеното и да испорача, а Софија не може да го држи во заложништво нејзиното проширување“. Дискусијата за проширувањето меѓу амбасадорите на земјите-членки во предминатата недела беше симната од дневен ред и не беа усвоени заклучоците поради ставот на Бугарија дека не може да се одржи првата меѓувладина конференција за пристапни преговори со Македонија без решавање на билатералните спорови.