Министерот за внатрешни работи Наќе Чулев денеска истакна дека полицијата е подготвена за спроведување мирни, фер, демократски избори. Тој посочи дека самиот процес на гласање ќе биде безбеден и ги повика граѓаните да излезат и да го дадат својот глас за опцијата што сметаат дека треба да победи. Чулев укажа и на потребата од поголемо полициско присуство на одредени точки проценети дека се со висок ризик, како места на појави на недозволено политичко агитирање.
„Мапирани се критичните точки, проценети дека се со висок безбедносен ризик од аспект на можни изборни нерегуларности. Нагласена е потребата од насочување на активностите за спречување појави на изборен поткуп, уцени и манипулации со гласовите на избирачите. Тоа се претежно делови на населените места каде живеат социјално ранливи семејства“, рече Чулев, кој е во работна посета на подрчјата што се под ингеренција на СВР- Охрид.
Ќе ја намали ли корона вирусот излезноста на изборите?
На тие избирачки места со висок ризик, според него, ќе има зголемено присуство меѓународни набљудувачи. Во однос на информациите објавени на социјалните мрежи за појави на агитирање на полициски службеници за одредена политичка опција, Чулев вели дека таквото однесување е недозволиво, спротивно на кодексот на полициското работење, но и интерните акти на МВР.
„Имаме информации, случаи се регистрирани во Скопје и Куманово. Против тие полицички службеници се преземаат контретни мерки, бидејќи се работи за потешко кршење на прописите најверојатно ќе бидат донесени ригорозни казни, односно отказни решенија“, додаде Чулев.