Претседателката на Европска комисија, Урсула фон дер Лајен денеска изјави дека имала добар разговор со српскиот претседател Александар Вучиќ. Според неа, по изборите во Србија потребен е широк дијалог со сите политички сили за да се постигне напредок во реформите, што се потребни за земјата да се приближи до Европска Унија.
„Дијалогот со Косово е клучен“, напиша на Твитер, Фон дер Лајен.
Вучиќ денеска престојува во еднодневна посета на Брисел. Тој, како што е соопштено во Белград ќе се сретне со претседателката на Европската комисија Урсула фон дер Лајен, претседателот на Европскиот совет,Шарл Мишел, еврокомесарот за соседска политика и проширување Оливер Вархеји и специјалниот претставник на Европската унија за дијалогот Белград-Приштина и други регионални прашања во Западен Балкан Мирослав Лајчак.