Министерството за здравство Венко Филипче вечерва соопшти дека од десетмината кои попладнево беа тестирани за коронавирус, петмина се позитивни на Ковид-19.
„Позитивна е сопругата на веќе дијагностицираниот пациент од Скопје и четири здравствени работници – двајца доктори и две медицински сестри од Дебар. Со ова, бројката на заболени со коронавирус во земјата се искачи на 31“, изјави Филипче.
Министерот истакна дека трудот, напорот и улогата на здравствените работници сега е непроценлива и дека во овој момент е најважно да се обезбеди стабилен здравствен систем. Тој повтори дека епидемијата е во силен ек и согласно епидемиолошките податоци, очекувано е бројот на заболени да расте во наредниот период.
„Најважно е пикот, односно врвот на епидемијата да не биде остар, да не се случи нагло“, изјави Филипче.
Според Филипче ако состојбата со ширењето на вирусот продолжи со овој интензитет, можно е да се продолжат веќе постоечките мерки и препораки, односно да останат затворени градинките и училиштата.