Израелскиот премиер Бенјамин Нетанјаху денеска во Москва се очекува да го брифира рускиот претседател Владимир Путин за планот за Блискиот исток на американскиот претседател Доналд Трамп.
Во пресрет на денешната посета Русија го ослободи американско-израелскиот државјанин обвинет за дрога откако Путин го помилува. Мировниот план на Трамп, кој беше објавен претходно неделава, беше пречекан со одобрување од Нетанјаху, со студени реакции од Обединетите нации и Европската унија и со лутина од Палестинците и други земји.
За израелско-палестинскиот конфликт во планот се предлага решение со две држави, но Ерусалим во целост да остане престолнина на Израел. Договорот предлага и евентуално создавање палестинска држава со нејзин главен град сместен, во она што Трамп го опиша како „источен Ерусалим“, но пред тоа треба да се исполнат серија услови. Палестинскиот претседател Махмуд Абас веднаш го одби планот како произраелски и рече дека сака да продолжат преговорите со неутрални посредници.