Претседателот Стево Пендаровски во годишното обраќање пред пратениците во Собранието рече дека целта му била да остане независен, претседател на сите, а не партиски послушник или апологет на некој транзициски олигарх. Претседателот рече дека поделбите во општество, за кои говореше пред Собранието и во својот инаугуративен говор, се сè уште длабоки, и ако некогаш луѓето се делеа по етничка линија, сега и меѓу Македонците поделбите се продлабочија.
„Граѓанско помирување нема да се случи само по себе, ако никој не понуди конкретни платформи за дијалог меѓу засегнатите страни. Сè додека се делиме и ги дискриминирам поинаквите, нема напредок и прогресивно општество, ни една промена на подобро не се случила зошто јавноста била подготвена за тоа, туку затоа што некој активно работел тоа да се случи, а одговорноста да се биде во првите редови на таа борба е во нас, избраните политичари“, рече Претседателот.
Пендаровски рече дека сака уште од сега јавно да ѝ порача на следната власт, веднаш по изборите да спроведе прочистување и кај судиите и кај обвинителите, но, прво, кај политичарите.
Во својот говор се осврна и на Закон за јазиците и на мислењето на Венецијанската комисија, кое како што вели, за жал сите го прочитаа преку етничка и политичка призма.
„Какво фајде од него, ако одредбите останат само на хартија. Но ако законите ги носиме заради граѓаните, чесно е да ги направиме сите корекции за тие да профункционираат“, рече тој.
Пендаровски рече дека од 2017 кога во Собранието се случија немилите настани, државата сега е вратена во нормала и е на прагот во НАТО и членство во ЕУ, што е најбрза обнова на државните институции, но граѓаните сметаат дека тој прогрес не е доволен, оти тие очекуваа повеќе. Пендаровски зборуваше за правосудниот систем, за незавршувањето на процесите, за случајот Рекет и за бегството на Груевски.
„Безмалку три децении независност, а зад решетки не заврши ниту еден политичар или преку ноќ збогатен бизнисен, а таму требаше да завршат повеќе од еден“, рече тој.
Претседателот се осврна и на договорите со Грција и Бугарија. Тој вели дека компромисите биле тешки, но со нив се отворила вратата кон НАТО и ЕУ, но не е компромитиран идентитетот.
Ова е прво годишно обраќање во законодавниот дом на Пендаровски од стапувањето на должност во мај годинава, по победата на претседателските избори. Тој зборуваше и за регионални прашања, за климатските промени, за пописот.