Рускиот премиер Дмитри Медведев пристигна во главниот град на Куба, Хавана, на дводневна посета, каде што треба да се сретне со претседателот Мигуел Диаз-Канел, да посети енергетски проект во предградие на Хавана и Капитолот, кој се реновира, а златната купола е подарок од Москва.
Според соопштението од руската влада, Медведев ќе разговара за „актуелни прашања од руско-кубанската трговска соработка, економијата, инвестициите, енергијата, транспортот, културата и соработката во хуманитарните и други области“.
Треба да бидат потпишани бројни билатерални договори и трговски спогодби, но не беа дадени детали.
Посетата на Медведев доаѓа во време на нова економска криза во Куба поради американските санкции. Двете области кои се најсилно погодени, нафтената и транспортната индустрија, може да добијат руска помош.
Куба беше клучен сојузник на СССР во времето на комунизмот, а се уште има добри односи со Русија, но и со трговските партнери Венецуела, Кина, Шпанија и Канада.
Минатиот месец, рускиот вицепремиер Јури Борсов рече дека трговската размена меѓу Русија и Куба се зголемила за 34 проценти на 388 милиони долари во 2018 година, и дека се очекува оваа година да достигне 500 милиони долари.