Фејсбук соопшти дека на своите интернет платформи открил „софистицирани“ обиди за влијание врз американската политика, можно поврзани со Русија. Оваа американска компанија наведе дека на социјалните мрежи Фејсбук и Инстаграм избришала 32 профила, бидејќи нивните сопственици учествувале во координирано дејствување и затоа што налозите најверојатно биле лажни. Фејсбук додава дека не знае кој стои зад овие активности, но оти е можно да постои врска со Русија, бидејќи била откриена поврзаност меѓу овие профили и профилите на руската приватна компанија Агенција за истражување на интернетот кои биле избришани по претседателските избори во САД во 2016 година.
