Институтот за јавно здравје објави дека во дебарско има епидемија на мали сипаници со регистрирани 17 случаи.
„Сите заболени во епидемијата се во меѓусебна епидемиолошка врска и сите се жители на Дебар, со исклучок на една жена која е жител на Охрид, но секојдневно патува во Дебар каде што работи. Во однос на возраста, 11 од заболените се над 30 години, три лица се на возраст од 20-29 години, и по едно лице припаѓа на возрасните групи: од 15-19 години, од 1-4 години и под една година“, објави ИЈЗ на својата веб страница.
Според соопштението, деветмина заболени се машки, а осум женски лица. За десетмина од нив има лабораториска потврда, седум се со утврдена епидемиолошка врска, а за четири лица сé уште се чекаат конечните лабораториски анализи.
Деветмина од заболените се вакцинирани со една доза, три лица се вакцинирани со две дози, четири се невакцинирани, а едно лице е со непознат вакцинален статус.