Пред почетокот на Самитот на НАТО, американскиот претседател Доналд Трамп, ја повика Германија веднаш да ги зголеми трошоците за одбрана на два проценти од БДП и ја обвини дека е под контрола на Русија, објави агенцијата Ројтерс.
„Германија е целосно под контрола на Русија, тоа е многу лошо за НАТО. На Русија ѝ се плаќаат милијарди, се градат гасоводи. Германија е заложник на Русија, Берлин се потпира главно на увозот на руски гас и ги отстранува своите нуклеарни централи. Нешто мора да се направи. Ѝ плаќаат милијарди на Русија, а ние плаќаме милијарди за да ги заштитиме од Русија“, изјави Трамп на работниот појадок со генералниот секретар на НАТО, Јенс Столтенберг, пред почетокот на Самитот во Брисел.
Тој додаде и дека поранешниот германски канцелар Герхард Шредер работи за „Газпром“.
„Ги штитиме сите, плаќаме многу, тоа се случува со децении. Тоа е многу нефер кон нашата земја. Не за десет години, туку веднаш треба да се исполни целта трошоците за одбрана да бидат два проценти од БДП“, рекол Трамп.