За 15 февруари е одложено судењето за предметот на СЈО „Т.Н.Т“ во кое обвинети се поранешниот премиер Никола Груевски, поранешниот министер за транспорт и врски Миле Јанакиески и поранешниот градоначалник на Гази Баба Тони Трајковски за уривање на комплексот „Космос.“
На предлогот за одложување на судијата Огнен Ставрев реагираше одбраната дека времето е кратко и немаат доволно време да се подготват, а пред судот реагираше и Груевски кој на судијата му рече дека не е фер бидејќи не им се остава доволно време за подготовка.
„Во понеделник, вторник и среда сме по цел ден на рочишта, а вие закажувате судење веднаш во четвтрок. Вака немаме време да ги слушнеме снимките, да ги видиме доказите и да се подготвиме, рече Груевски оценувајќи го судењето како фарса: „на еден друг политичар му се закажуваат рочишта на три месеци, а мене на три дена, рече Груевски.
Во случајот „Т.Н.Т“ обвинети се седум лица за уривањето на комплексот „Космос“ на бизнисменот и претседател на Партијата за европска иднина Фијат Цаноски.
Денеска исто така беше одложено и рочиштето за предметот на СЈО „Тотал“, во кој новинарот Драган Павловиќ-Латас е обвинет за даночно затајување. Неговата одбрана информираше дека Павловиќ поради лични причини не присуствувал на денешното рочиште.