Собранието на Република Македонија десетина минути по почетокот на попладневното продолжение на 15. седница ја заврши општата расправа по Предлог - законот на законот за употреба на јазиците, во прво читање.
Претседателот на Собранието Талат Џафери, најави дека седницата ќе продолжи утре напладне кога се очекува пратениците да гласаат за Предлог-законот, по што народните избраници ќе можат да поднесуваат амандамни по текстот.
На денешната расправа пратениците од владејачкото мнозинство порачаа дека навлегуваме во фаза на градење доверба меѓу заедниците.
" Да испратиме порака дека Собранието ќе им ги гарантира сите права на граѓаните, независно од кој етникум доаѓаат и на кој јазик зборуваат", порачаа пратениците од владејачкото мнозинство..
Опозицијата повторно го искажа ставот дека законот е неуставен, дека нема да биде применлив и дека ќе резултира со дополнителни фрустрации кај граѓаните.
Решението, како што истакнаа претходно пратениците од ВМРО-ДПМНЕ, е набрзина предложено и е со европско знаме, и тоа предизвика дополнителен сомнеж и страв кај дел од јавноста. Според оваа партија, во втората фаза законот треба да се надгради со елементи кои дополнително ќе ги засилат граѓанскиот и мултиетничкиот карактер на државата.
Собранието по завршувањето на расправата за Предлог - законот на законот за употреба на јазиците, во прво читање ја продолжи работата по 12. седница на која на дневен ред се закони од опозицијата и одлуката за утврдување на бројот на потпретседатели на Собранието