Талибанците убиле најмалку 30 луѓе во северната провинција Сари Пул, во Авганистан. Тамошните власти изјавија дека милитантите прво зазеле контрола на Мирзавалинг во областа Сајад на 5 август, по два дена интензивни препукуваања со безбедносните сили, а потоа ги убиле луѓето.
Провинцискиот гувернер Захир Вахдат денеска изјави дека жртвите се главно цивили, вклучително и жени и деца, како и припадници на локалните безбедносни сили. Шефот на провинцискиот совет, Мохамад Нуор Рахмани, соошти дека 25 цивили се водат за исчезнати.
Талибанците ја презедоа одговорноста за нападот, но не и за цивилните жртви и за киднапирањата.
Официјални лица претходно изјавија дека во борбите загинале најмалку седум полицајци и 10 талибански борци, а четворица полицајци се повредени.