Пред зградата на српскиот Парламент во Белград се одржаа протести поради победата на досегашниот српски премиер Александар Вучиќ на претседателските избори во Србија. Стотици, претежно млади, лица скандираа слогани и носеа транспаренти со натписи: „Стоп за диктатурата“, „Во аголот“, „Крај“ и слично. Тие вчера излегоа и со барања: да бидат променети раководствата на српската државна изборна комисија и на националниот медиумски регулатор, како и директорот на српската државна телевизија и неговиот главен уредник, кои ги обвинуваат за изборна измама. Вучиќ победи во првиот круг од претседателските избори што се одржа во неделата.