Специјалното јавно обвинителство преку соопштение најостро ги демантираше наводите за поврзаност на обвинителството со Социјалдемократскиот сојуз на Македонија, искажани во денешното соопштение на ВМРО-ДПМНЕ.
„Во оваа прилика укажуваме дека ова Јавното обвинителство, како независна и професионална институција, е формирано со Закон за кој во Собранието на Република Македонија гласаа вкупно 111 пратеници, вклучително и пратениците од партијата ВМРО-ДПМНЕ“ се наведува во краткото соопштение од СЈО.
Претходно ВМРО-ДПМНЕ соопшти дека со внимание и одблиску ги следеле како што напишаа тенденциите на партискиот огранок на СДСМ наречен СЈО во случајот со обидот за “незаконско одредување притвор на сопственикот на ТВ НОВА, Сеад Кочан“.
„ВМРО-ДПМНЕ ги предупредува судиите, независно дали се под притисок на СДСМ, или пак од било која причина сакаат да го задоволат Зоран Заев и неговиот сценарист, дека треба да работат согласно законот и Уставот и дека не смеат да се претворат во политичка алатка на СДСМ и СЈО. Секое незаконско работење ќе подлежи на одговорност, и секој во оваа држава треба да е еднаков пред законите, вклучително и судиите“, наведоа од ВМРО-ДПМНЕ.