Кинескиот телекомуникациски гигант ЗТЕ се согласи да плати рекордни над 890 милиони долари казна за тоа што ги снабдил Иран и Северна Кореа со висока технологија што е кршење на американските санкции, соопшти американската администрација. Според договорот, ЗТЕ би можел да се соочи и со дополнителна казна од 300 милиони долари ако се покаже дека ги крши и новите санкции што ги воведе Вашингтон против Иран. ЗТЕ која е во сопственост на кинеската влада има договори со иранската влада да гради и управува со телекомуникациски мрежи во таа земја користејќи опрема и софтвер кои потекнуваат од Соединетите држави.
