Американскиот државен секретар Рекс Тилерсон рекол дека Соединетите Американски Држави нема да се согласат на соработка со руската војска во Сирија се додека Москва не препознае дека не сите опозициски сириски групи се терористички, пренесуваат европските сојузници.
На состанокот со неговите колеги од Франција, Германија, Турција и други држави кој се одржа на маргините на средбата на групата 20 во Бон, Тилерсон рекол дека администрацијата на Трамп ги поддржува напорите на Обединетите нации за постигнување мир во Сирија преку преговори кои треба да продолжат на 23 февруари во Женева. Дипломатите велат дека Тилерсон на состанокот рекол дека изедначувањето на Москва со сириската влада која ги смета сите сириски бунтовнички групи за терористички ќе ја направи тешка воената соработка меѓу Вашингтон и Москва.
Еден дипломат за Ројтерс рекол дека Тилерсон јасно кажал оти тие нема воено да соработуваат се додека Русија не прифати дека не се сите опозициски групи терористички. Францускиот министер за надворешни работи Жан-Марк Еро рече дека дискусијата со Тилерсон била корисна.