Шефот на руската дипломатија Сергеј Лавров изјави дека Москва се надева оти администрацијата на американскиот претседател Доналд Трамп ќе испрати експерт за Блискиот Исток на разговорите за конфликтот во Сирија што треба да се одржат во главниот град на Казахстан, Астана, на 23 јануари.
„Се надеваме дека администрацијата на Доналд Трамп ќе може да делегира експерт за Блискиот Исток, имајќи го предвид фактот дека Русија и САД се копретседавачи со Меѓународната група за поддршка на Сирија“, изјави вчера Лавров по разговорите со казахстанскиот министер за надворешни работи Каират Абдрахманов.
Вашингтон на 19 јануари потврди дека добил покана за учество на разговорите во Астана, но американската амбасада во Казахстан вчера соопшти дека не може да потврди дали администрацијата на претседателот Трамп ќе испрати свој претставник.
Советот за безбедност на ОН ја изрази својата поддршка за мировните преговори за Сирија под покровителство на Русија, Турција и Иран, но нагласи дека тие не смеат да ги стават во втор план преговорите под покровителство на ОН. Светската организација го испраќа пратеникот за Сирија, Стефан де Мистура, на преговорите во Астана.