Портпаролот на рускиот претседател Владимир Путин денеска рече дека Кремљ се надева дека Путин и избраниот американски претседател Доналд Трамп „ќе се согласуваат“. Дмитри Песков зборуваше пред новинарите ден откако Трамп, кој вчера ја одржа својата прва прес конференција го пофали Путин и рече дека ќе се обиде да ги подобри лошите и затегнати односи меѓу Русија и САД.
Трамп вчера нагласи и дека сега тој не знае дали ќе се согласува со Путин, се надева дека ќе биде така, но дека има добра шанса тоа и да не се случи.
Москва навистина се надева дека претседателите ќе се согласуваат, рече Песков додавајќи дека Трамп сепак зборувал за неговата подготвеност за дијалог што не значело и спремност за согласување за сите прашања меѓу двајцата. Тоа е тешко возможно и Москва не го очекува тоа, рече Песков.