Претседателот на Перу, Педро Пабло Кучински, за Раша тудеј изјави дека земјите од Пацификот треба да постигнат нов трговски договор со Кина и со Русија, ако новоизбраниот американски претседател Доналд Трамп, како што се очекува, се откаже од договорот постигнат со претседателот Барак Обама. Поради противењето од Трамп и од републиканците во Конгресот, Обама вчера официјално се откажа од напорите за потпишување на Договорот за транс-пацифичко партнерство во кој учествуваат 12 земји, но Русија и Кина се исклучени.
„Може да биде заменет со сличен договор, но без САД“, рече вчера за РТ претседателот на Перу, кој е поранешен банкар од Вол Стрит и застапник за слободна трговија.
„Мислам дека ќе биде најдобро да постигнеме азиско-пацифички договор во кој ќе бидат вклучени Кина и Русија. Ќе треба да има нови преговори“, изјави Педро Пабло Кучински.
Наредната недела Перу ќе биде домаќин на Самитот за азиско-пацифичка економска соработка, на кој треба да учествуваат лидерите на Кина, Русија, САД и Јапонија, за прв пат по неочекуваниот избор на Трамп за претседател. Обама планира да ги извести другите лидери дека судбината на договорот сега е во рацете на Трамп, кој во претседателката кампања зборуваше токму против договорот.
Кина веќе работи на алтернативен договор.