За предлогот поднесен од пратеникот Павле Трајанов, да се прошири дневниот ред на денешната седница на Собранието со две нови точки – предлог-закон за изменување и дополнување на Законот за заштита на сведоци и Предлог-закон за изменување на Законот за Јавно обвинителство за гонење на кривични дела, што беше и барање на специјалната јавна обвинителка Катица Јанева, „не гласале“ и тројца пратеници од СДСМ.
Во документот од гласањето објавен на страницата на Собранието, дека не гласале, се наведени Милена Ѓоргиева, Миле Андонов и Ален Георгијев, пратеници од СДСМ. Лиле Поповска од ДОМ, независната пратеничка Љубица Буралиева, Ермира Мехмети, Али Ахмети, Хазби Лика, Артан Груби од ДУИ не биле присутни, а Талат Џафери од истата партија не гласал. И од ДПА има неколкумина пратеници што не гласале или не биле присутни меѓу кои се и Мендух Тачи и Имер Алиу.
За предлогот на Трајанов гласаа 50 пратеници, а 56 пратеници од владиното мнозинство беа против.