Претставници на партиите потписнички на договорот од пржино за надминување на политичката криза во Македонија вчера начелно ги усогласија измените на законите за влада, за внатрешни работи, за медиумите и за Изборниот законик што беа договорени на 20 јули годинава. Работните групи ги усогласија и деталите околу ад-хок телото кое во предизборниот период ќе го следи известувањето на медиумите. Како што изјавија претставниците од ВМРО-ДПМНЕ и од СДСМ, Никола Тодоров и Радмила Шеќеринска, законските измени се очекува да бидат изгласани до крајот на неделата. Доколку до крајот на неделава пратениците ги усвојат договорените законски решенија ќе се овозможи и одржување предвремени парламентарни избори до крајот на годинава.
