Руските власти соопштија дека уапсиле седуммина припадници на исламската држава во уралскиот град Екатеринбург. Федералната служба за безбедност информира дека исламистите, меѓу кои има државјани на Русија и на централноазиските држави, биле уапсени вчера. Службата соопшти дека групата планирала „високопрофилни терористички напади со користење на експлозивни уреди изработени во домашни услови на територијата на Москва, Санкт Петерсбург и во регионот на Свердловск“ на Урал. За време на претресите била пронајдена и лабораторија за изработка на експлозивни направи. Руските власти соопштија дека групата била предводена од член на ИД кој во Русија дошол од Турција и оти по нападите милитантите планирале да заминат во Сирија. Властите во Москва проценуваат дека околу 3.000 руски државјани се борат на страната на Исламската држава во Сирија.
