Енес Омерагиќ кој синоќа во сараевската населба Рајловац убил двајца војници и ранил неколку други лица, се самоубил во својата куќа која била опколена од полицијата. Ова го потврди министерот за безбедност на Босна и Херцеговина Драган Мектиќ. Претходно Омерагиќ во една обложувалница убил двајца припадници на Оружените сили на Босна и Херцеговина и ранил уште еден војник, како и жена која работела во обложувалницата. Потоа тој стрелал во градски автобус при што го ранил шоферот, како и двајца патници. Сараевските медиуми го идентификуваа напаѓачот како селафист, односно припадник на ултра конзервативната исламистичка идеологија која повикува на џихад во светот. „Доколку се потврди дека станува збор за тероризам, а постои таква можност, тогаш е во прашање безбедноста на граѓаните и мораме да дејствуваме брзо и ефикасно “, изјави министерот Мектиќ.
