Осум бегалци се водат како исчезнати откако дрвен чамец со кој се движеле кон грчкиот остров Лезбос се судрил со патролен чамец ангажиран на операција за спасување, по што потонал, соопшти грчката крајбрежна стража. Инцидентот се случил денеска на половина наутички милји од островот Лезбос кој е главна точка за влез на бегалци на нивниот пат од соседниот турски брег. Стотина илјади луѓе кои бегаат од војна или сиромаштија досега оваа година преминале од Турција во Грција.
Во меѓувреме грчката крајбрежна стража во потрага по бродови со бегалци, во изминатите 24 часа од водите на Егејско Море спасила 830 лица. Спасувачките операции се изведени во близина на грчките острови Лезбос, Киос, Самос, Агатониси и Кос, информираа локалните власти. Во средата, грчките власти во еден помал чамец пронајдоа тела на жена, девојче и детенце. Чамецот бил забележен од екипажот на хеликоптер на полициската агенција Фронтекс на Европската унија. Телата биле пронајдени по целодневната потрага по 24 лица од тој чамец, што се наоѓал во близина на турските територијални води.