Со натпреварот Чешка – Естонија денеска во 14:30 часот започнува 39. ФИБА Европско првенство во кошарка кое ќе се игра во повеќе држави.
Организацијата на ова ЕП ѝ беше доделена на Украина, но заради познатите случувања во таа држава ФИБА одлучи истото да се одржи во Загреб, Рига, Берлин и Лил. Домаќин на завршницата ќе биде Лил со мулти-функционалната сала „Стад Пјер Моро“ со капацитет од 27 илјади гледачи.
Македонската репрезентација се наоѓа во групата Ц којашто ќе игра во Загреб. Во група со нашата репрезентација се и фаворитите Хрватска, Словенија, Грција, Холандија и Грузија. Токму со последниве две репрезентации, Македонија ќе се бори за место кое води во следната фаза, пренесува МИА.
Македонската репрезентација на ЕП ќе настапи подмладена со само една цел, а тоа е да ја помине групната фаза. ФИБА ја рангираше Македонија на 22. Место од вкупно 24 учеснички на првенството. Сите наши противници во групата се подобро рангирани од кои најслабо котира Холандија на 21. Место. Најголеми фаворити на првенството се Шпанија, Франција и Србија, а тука се вбројуваат и Литванија, Хрватска и Турција.
Првиот противник на Македонија е Грција, мечот се игра денеска од 18:00 часот во Арена Загреб.
