Европската унија денеска ја повика Турција да одговори на соодветен начин на тероризмот, за да не се загрози кревкиот мировен процес со курдските бунтовници. Еврокомесарот за соседска политика и проширување Јоханес Хан, на турскиот министер за евроинтеграции Волкан Бозкир, му кажал дека Анкара „има право да спречи и да реагира на секој облик на тероризам“, но дека „одговорот мора да биде сразмерен, насочен и на ниту еден начин да не го загрози демократскиот политички дијалог“, рекол Хан. Тој додал дека европскиот блок ја признава посветеноста на турските власти во засилувањето на борбата против Исламска држава и ја истакнува силната поддршка на ЕУ кон овие напори, но изразил и длабока загриженост поради можноста случувања да имаат негативно влијание на курдско-турскиот мировен процес. Во меѓувреме денеска тројца турски војници загинаа, а еден е повреден во експлозија на мина на југоистокот на Турција, соопштија безбедносни извори. Се претпоставува дека зад овој напад стојат припадници на Курдската работничка партија, наведуваат изворите.
