Американскиот претседател Барак Обама денеска ги повика Кенијците да „го изберат патот на напредок“ со тоа што ќе продолжат со борбата против корупцијата, ќе се соочат со тероризмот и ќе ги унапредуваат правата на жените. За време на историската посета на татковината на неговиот татко, Обама рече дека корупцијата се толерира во кениското општество и на неа се гледа како на „нормална работа“. Обама исто така се осврна на справувањето со исламистичката сомалиска организација Ал Шабаб и вети дека САД ќе ѝ бидат партнер на Кенија. Тој вчера понуди дополнителна обука и фондови за борба против тероризмот. Обама исто така побара поголема толеранција и почит за жените и девојчињата, повикувајќи на запирање на насилството против жените, присилните бракови со девојчиња кои би требало да одат на училиште, сексуалните напади и традиционалното „осакатување на гениталиите“. Обама рече дека за овие традиции нема место во 21 век.