Насилството против новинарите во Македонија неделава ескалира и зазема драматични размери. Животот на новинарите сериозно е доведено во прашање, рече претседателот на ЗНМ, Насер Селмани на прес конференција. Тој вели дека вербалните закани по живот, физичките напади од јавни личности и уништување на приватен имот на новинарите, ескалираа со брутaлен напад врз сопственикот на порталот Доказ, нанесувајќи му тешки телесни повреди.
„Бараме веднаш да сопре насилството против новинарите и медиумските работници во спротивно насилниците ќе се охрабрат и ќе може да посегнат по нечиј живот. Ние сме убедени дека овие напади се оркестрирани и имаат намера да создаваат страв и несигурност кај новинарите со цел да не ја критикуваат власта“, вели Селмани.
За четири години ЗНМ има регистрирано над 20 закани и физички напади врз новинари, од кои речиси пола се случиле во првите шест месеци од оваа година, а насилниците досега не се казнети.
Од ЗНМ ги повикуваат политичките партии да престанат да ги користат новинарите како топовско месо во нивните меѓусебни бескрупулозни пресметки за власт.