Одбраната на обвинетите во случајот „Пуч“ во приговорот денеска побара Кривичниот суд да го отфрли обвинението против петтемина опфатени во случајот. Според адвокатите, обвинението е полно со нелогичности, затоа што, меѓу другото во него не се спомнува ниедна конкретна странска служба, а шпионажата во принцип секогаш е поврзана со одредена тајна служба на некоја странска држава.
Исказ пред судот даде и првообвинетиот Зоран Верушевски, кој истакна дека прислушувањето е креација на 5-та управа и оти како проект тоа е започнато во 2007-та година. Тој рече дека имал 20-ина средби со вработени во УБК и оти верува дека тие ќе бидат сведоци во натамошниот процес.
Со обвинителниот акт во случајот „Пуч“ се опфатени пет луѓе. Првоосомничен е поранешниот директор на ДБК, Зоран Верушевски, кој се товари за „неовластено прислушување и тонско снимање“, „шпионажа“ и „насилство спрема претставници на највисоките државни органи“. Меѓу обвинетите и лидерот на СДСМ, Зоран Заев.