Советот за безбедност на Обединетите нации на денешната седница посветена на Косово ќе го разгледа тримесечниот извештај на генералниот секретар Бан Ки Мун за работата на УНМИК. На седницата ќе учествуваат министрите за надворешни работи на Србија и на Косово Ивица Дачиќ и Хашим Тачи. Во извештајот Бан Ки Мун го поздравува обновувањето на разговорите во Брисел меѓу премиерите на Србија и на Косово со посредство на Европската унија и повикува на итно решавање на прашањето за создавање Заедница на српски општини, како и воспоставување специјален суд на Косово.
