Шефот на Мисијата на ОБСЕ во Скопје, Амбасадорот Ралф Брет, изрази загриженост во врска со вчерашните протести пред зградата на Владата. Според Брет, правото на мирно собирање и протест е уставно загарантирано право на сите граѓани во земјата и таквите протести не треба да бидат проследени со насилство.
Тој порачува дека секој граѓанин треба да биде во можност да го искаже своето мислење и тоа треба да го направи на мирен и одговорен начин, а безбедносните сили треба да бидат во можност да ја вршат својата работа и да го одржуваат јавниот ред и безбедноста. Меѓутоа, полицијата треба да дејствува на професионален и на соодветен начин, со целосно почитување на индивидуалните права на учесниците на протестот. Брет ги повикува и властите и политичките актери, како и граѓаните, да покажат зрелост, да се однесуваат одговорно и да се воздржат од насилство.