Американскиот државен секретар Џон Кери денеска вети поголема поддршка за Сомалија за време на неговата посета на земјата, која се обидува да се обнови по дводецениската војна и години на борби со милитантите на Ал Шабаб. Кери помина неколку часови на аеродромот во Могадишу, каде се сретна со сомалискиот претседател Хасан Шеик Мохамуд и премиерот Омар Абдирашид Али Шармке.
Тој порача и дека пред 20 години САД биле принудени да се повлечат од Сомалија, мислејќи на конфликтот во 1993 година кога 18 американски и стотици сомалиски војници беа убиени за време на воена и хуманитарна интервенција која заврши лошо. Кери нагласи дека ја посетил денеска Сомалија, бидејќи земјата ја обновува соработката со меѓународната заедница и тоа, според него влева големи надежи, кои се помешани со загриженост.