Претседателот Ѓорге Иванов денеска се сретна со американскиот амбасадор Џес Бејли, шефот на Делегацијата на Европската унија Аиво Орав, со претставникот на Мисијата на ОБСЕ, Мариан Берц и со шефот на Канцеларијата за врски на НАТО, капетан Румен Радев. Од кабинетот на претседателот информираат дека на средбата биле разменети мислења и информации околу актуелната политичка состојба во Македонија, како и за состојбите и очекувањата во врска со членството на земјата во ЕУ и во НАТО. Претседателот Иванов истакнал дека Македонија високо го цени партнерството и пријателството кои, како што вели, во континуитет се развиваат со САД, ЕУ, НАТО и ОБСЕ, а изразил и благодарност до соговорниците за нивната посветеност кон надминување на предизвиците поврзани со актуелната политичка состојба во земјата.