На денешната средба на претседателот на СДСМ со амбасадорот на ЕУ во Македонија, Зоран Заев го информирал Аиво Орав за последните случувања по објавата на случајот „Пуч“ и истакнал дека „не може да биде уцена и обид за државен удар легитимно барање на лидер на опозиција за формирање техничка влада, која би обезбедила услови за спроведување фер и демократски избори“.
Заев, како што соопштува СДСМ, на средбата ја обвинил власта за „контрола на судството и медиумите и го оквалификувал како непрофесионално и необјективно известувањето за последните настани со малку простор за опозицијата“.
Претседателот на СДСМ му соопштил на амбасадорот Орав дека СДСМ „ќе објави се што има и оти ќе продолжи легално и легитимно да се бори, според соопштението, за конечно враќање на слободата и демократијата во Република Македонија“.