Стотина претежно млади луѓе излегоа на денешниот марш против загадувањето на воздухот во центарот на Скопје, во организација на невладината Гоу грин. Демонстрантите, кои носеа гас-маски, за симболично да покажат дека во Скопје тешко се дише, извикуваа „биди зелен“ и „сакаме чист воздух“.
„Дојде време да мораме да маршираме за да го имаме она што бесплатно сите нè следува“, велат организаторите кои маршираа прашувајќи „Кој е крив што градот ни е сив?“
Тие велат дека Скопје може е најзагаден европски град.
„Од ден на ден, нивото на ПМ10 честичките расте се повеќе и повеќе, обојувајќи го градот во сиво. Секои 10 микрограми ПМ10 честици во кубен метар воздух го зголемуваат ризикот за рак на бели дробови за дури 22 отсто , а во Скопје нивото на овие честици достигна дури и до 700 микрограми на метар кубен. Дозволеното ниво на овие честички изнесува максимум 50 микрограми на кубен метар“, велат организаторите кои бараат конкретни мерки за спречување на загадувањето.