Авганистанскиот претседател Ашраф Гани денеска во Исламабад се сретна со пакистанскиот премиер Наваз Шариф. Шефот на пакистанската влада по разговорите рече дека Пакистан и Авганистан решиле да формираат „силно економско партнерство“ со зголемување на трговијата и инвестициите и подобрување на инфраструктурата. Пакистански претставници соопштија дека разговорите меѓу двајцата лидери биле сеопфатни. Гани вчера се сретна и со претседателот Мамнун Хусаин и неколкумина негови советници, како и со пакистанскиот министер за финансии Ишак Дар. Гани и Шариф разговарале и за безбедносни прашања, меѓу кои и заеднички обуки за безбедносните сили и граничната полиција. Ова е прва посета на Гани на Пакистан откако ја презеде функцијата пред два месеци. Авганистанскиот претседател вчера го посети генералштабот на пакистанската армија во Равалпинди и се сретна со началникот, генерал Рахил Шариф.