Највредните примероци на македонското културно наследство ќе бидат претставени во новиот, објект на Археолошкиот музеј на Македонија, кој вечер свечено ќе биде отворен.
На три ката и површина од 6.000 квадратни метри пред јавноста ќе бидат изложени повеќе од 6.000 артефакти од праисторијата па до средниот век.
Како што соопшти Министерството за култура, првпат и ексклузивно пред јавноста ќе биде претставен значаен дел од артефактите, меѓу кои: копијата од саркофагот на Александар Македонски, штитот од 3 век пр.н.е. од локалитетот Бонче, реконструкцијата на римската кочија од втор век од Делчево, како и стаклената чаша дијатрета од 4 век.