Рускиот претседател Владимир Путин ја критикуваше Молдавија за одбивањето да се консултира со Москва за спогодбата со која се зајакнуваат врските меѓу Кишињев и ЕУ. Зборувајќи на денешниот самит на Заедницата на независни држави во Минск, на кој присуствуваше и молдавскиот претседател Николае Тимофти, Путин изјави дека Договорот за асоцијација на Кишињев со ЕУ може да се одрази на економските врски меѓу Русија и Молдавија. Украина, Грузија и Молдавија ја потресоа Русија со потпишувањето на договорите за асоцијација со ЕУ во јуни годинава. Путин нагласи дека почетокот на спроведувањето на договорот за слободна трговија, кој е дел од договорот меѓу ЕУ и Украина, е одложен до 31 декември 2015 година, како резултат на „интензивните консултации“ на Кремљ со ЕУ и со Украина. Тој рече дека Кишињев не одговорил на „бројните повици“ на Москва да го направи истото.
