Министерот за финансии Зоран Ставревски изјави денеска дека буџетот во минатата година се реализирал според планираното. Расходите се реализирани со 159.505 милиони денари, приходите со 140.248 милиони денари и дефицитот е во рамки на планираното од 19.257 милиони денари.
Според него, македонската економија оствари раст од 2,9 проценти што е над проекцијата од 2 проценти. Ставрески истакна дека во периодот на криза не било секогаш лесно да се реализираат зацртаните политики, но оти Владата одговорила на најдобар начин без дополнително да го оптовари стопанството и со навремена исплата на обврските. Ставрески додава дека завршната сметка покажува дека е избран вистинскиот начин на кој требало да се справуваме со предизвиците.