Украинскиот министер за енергија Јури Продан, денеска во Брисел имаше средби со претставници на Европската Унија во врска со проблемите со снабдување со руски гас. На средбата со евро-комесарот за енергија, Гинтер Отингер, биле разгледани можностите за надминување на кризата отакако руски Газпром соопшти дека Украина должи 2,2 милијарди долари за испорачаниот гас и се закани дека ќе го прекине снабдувањето. Околу 40 отсто од рускиот извоз на гас за Европа оди преку Украина, па прекинот на снабдување за Украина, ќе значи и големи проблеми за Европа. Продан изјави дека се реални шансите тоа и да се случи, со оглед на фактот дека Украина не може да ги плати бараните 2,2 милијарди долари.
