Во автобусот на агенцијата „Тото“ што синоќа излета од патот во близина на градот Ѓер, на 50 километри од Будимпешта, се наоѓале 21 македонски државјанин, четири чешки и тројца бугарски државјани, информира македонското министерство за надворешни работи, додавајќи дека еден македонски државјанин бил потешко повреден и се наоѓал во животна опасност. Според официјалните полициски информации, несреќата се случила во еден часот и пет минути по полноќ, а автобусот кој се движел во правец кон Прага излетал од патот. Повредените патници биле пренесени во Татабања и во Ѓер. Деветмина кои биле отпуштени од болница решиле да се вратат во Скопје, а двајца го продолжиле патот за Прага, велат во МНР.
