САД жалат што Русија го прекина договорот за борба против дрогата

САД соопштија дека жалат за одлуката на Русија да го прекине билатералниот договор за соработка во спроведување на законот и борба против дрогата. Портпаролката на Стејт департментот Викторија Нуланд оцени дека потегот е „самоуништувачки“. Руската влада претходно соопшти дека договорот „не се однесува на моменталната реалност и го искористил својот потенцијал“. Според договорот од 2002 година, Вашингтон обезбеди финансиска помош за борбата на Москва против шверцот со дрога и други видови криминал, вклучувајќи трговија со луѓе, интернет криминал, перење пари, корупција и тероризам. Откажувањето од договорот доаѓа по неодамнешното влошување на односите меѓу САД и Русија. Претседателот на Комисијата за меѓународни односи во руската Дума Алексеј Пушков рече дека Москва е во процес на „кажување збогум на нашата зависност“ од Вашингтон.