Двајца француски командоси загинаа во неуспешна мисија во Сомалија

Исламистичките бунтовници во Сомалија соопштија дека втор француски командос починал од раните здобиени во неуспешниот обид за ослободување заложник. Портпаролот на исламистичката организација ал-Шабааб за новинската агенција Ројтерс изјавил дека бунтовниците подоцна ќе ги прикажат телата на убиените командоси. Француските власти ја потврдија смртта и на вториот командос. Специјалците во петокот вечерта во јужна Сомалија се обидоа да ослободат француски разузнавач кој е во заробеништво од 2009 година. Милитантите велат дека заложникот е сè уште жив и дека треба да одлучат што да прават со него, но француските власти соопштија дека веруваат дека и тој загинал во акцијата. Тие велат дека во нападот, кој почна неколку часа по француската интервенција во Мали, биле убиени 17 сомалиски милитанти.